Sur tous les ars qui sont dictz liberaulx
Servant à tous, tant doctes que ruraulx,
Le principal, après l'Arithmetique,
Est le sçavoir appellé geometrique,
Pour pervenir à ceulx qui sont plus haultz.
Tous artisans et gens mercuriaulx
Qui ont desir trouver secretz nouveaulx,
De mesurer fault qu'ayent la praticque,
Sur tous les ars.
Dieu a creé les corps, et animaulx
Depuis le ciel jusques aux mineraulx
Par nombre, pois, et mesure harmonique :
Heureulx est donc qui tel sçavoir explique,
Et qui entend secretz si generaulx
Sur tous les ars.